طبعا انتى عارفة فايدة الحمام المغربى لجسمك لانه مش بس بيشيل طبقة الجلد الميتة لا هو كمان بيرطب ويفتح البشرة ، طب تخيلى كدة لو الحمام المغربى كان حاجة ممكن تعمليها بكل سهولة فى البيت من غير ماتضطرى تروحى لبيوتى سنتر ولا حاجة ، وكمان بأقل تكلفة.تعالى أعلمك طريقة سهلة ومضمونة وهتجيب نتيجة أحسن من البيوتى سنتر:1- أول حاجة اقفلى باب الحمام والشباك كويس ، وبعدين افتحى الماية السخنه واملى البانية ، وهتلاحظى ان الحمام اتملى بخار زي السونة كدة وهو ده الى احنا عايزينة ، واقعدى فى البخار ده اقل حاجة 10 دقايق عشان مسام جسمك تتفتح .وبعد كدة انزلى فى الماية الى فى البانيو واسترخى ونامى لمدة 10 دقايق كمان وكل ماتطولى كل ما تدى نتيجة احسن .
2- بعد ماتخرجى من البانيو افتحى من تانى الماية السخنة عشان البخار يتكون تانى ، بعدها ادهنى جسمك بالصابون المغربى وسيبيه 10 دقايق بعدها اشطفى جسمك كويس اوى بماية سخنة .3- امسكى الليفة المغربى والبسيها فى ايديكى وتدعكى بيها جسمك كله بحركات دائرية ، ودى وظيفتها تشيل كل الجلد الميت ، وكل ماتحسى جسمك برد كوبى عليه ماية سخنة وارجعى ادعكى من تانى ، وبعد ماتخلصى اشطفى جسمك بماية سخنة.
4- تجيبى عشبة اسمها عشبة الداد من عند العطار الربع كيلو بحوالى 25 او 30 جنيه ودى وظيفتها تبيض الجسم وتفتح الاماكن الغامقة .
حطى منها معلقتين فى طبقى مع ماية ورد ونص ليمونة واعجنيها وخليها تكون متجانسة وافرديها على جسمك خصوصا الأماكن الداكنة ، وسبيها من 5 الى 7 دقايق مش أكتر من كدة وبعدها اشطفى جسمك بماية سخنة وهتلاقى نتيجة هايلة.
ملحوظة : حاولى ماتجيبيش العجينة على وشك عشان ريحتها مش حلوة.
5- بعد كدة الطمي المغربى وده وظيفته بيتوغل فى البشرة ويشيل الشوائب ويفتح الجلد ويعقمه ، حطى منه 3 معالق ونص ليمونه فى طبق واعجنيهم بماء الورد وسيبيه على جسمك لمدة 10 دقايق ، وماتنسيش وجود البخار ، وبعد ال10 دقايق افركى جسمك كويس اوى واشطفيه بماية فاترة .
6- بعدها اعملى رجليكى بالحجر وبعد ماتشيلى كل الجلد الميت هاتى علبة اي كريم مرطب وحطى عليه دم غزال واخلطيهم مع بعض ، خدى منه حته وادهنى بيها بطن رجليكى وكعبك وشوفى الفرق .
7- دى بقى اخر خطوة بيسموها التعطير ، هاتى ازازة تكون ببخاخة وحطى فيها نص ماء ورد وربع ماء عادى ونقطتين او تلاتة زيت ورد او لافندر او ياسمين واخلطيهم كويس ورشى على جسمك كله .
الجمعة مارس 27, 2015 8:59 am
